حوار مع فيروس أنفلونزا الطيور
إحنا : أهلا وسهلا يا عم الفيروس
الفيروس: أهلا أهلا ..
إحنا : لو سمحت ياريت تعرف إخوانا القراء بنفسك ..
الفيروس: اسمي في البطاقة h5 .. واسمي الفني ( فيروس أنفلونزا الطيور) ..
إحنا : ما هو محل الإقامة ؟
الفيروس: محل الإقامة مش ثابت للأسف .. أصلي غاوي سفر بيني وبينك ..
إحنا : طيب ما هو محل الميلاد ؟
الفيروس: أنا اتولدت أساسا في جنوب شرق آسيا .. قول في الصين كده ..
إحنا : كلمنا عن نفسك شوية ..
الفيروس: أنا فيروس عادي زى أي فيروس في الساحة الطبية .. بس كل ما هنالك إني وجه جديد وآنت عارف بقى وسائل الإعلام بتهتم بكل ما هو جديد ..
إحنا : إيه الجديد اللي قدمته ؟
الفيروس: يمكن الجديد إني غاوي فراخ وبط ووز .. وشهيتي مفتوحة حبتين .. بس كده ..
إحنا : طيب إيه اللي جابك عندنا يا أستاذ h5 ؟
الفيروس: أبدا .. لقيت كل حاجه بتجيلكم من الصين وانتم فرحانين بيها .. فلت آجي أنا يمكن ترحبوا بيا أنا كمان !
إحنا : نرحب بيك ؟ يعني جاي تخرب بيتنا ونرحب بيك ؟؟ تيجي ازاي دي ؟
الفيروس: يا بيه مالبضايع اللي جايالكم من الصين جايه تخرب بيتكم هيا كمان, وفرحانين بيها وطايرين بيها .. اشمعنه انا يعني ؟؟
إحنا : مش واخد بالي ..
الفيروس: اسمع يا سيدي .. البضايع الصيني دي مش جاية تضرب الصناعة والاقتصاد المصري ؟
إحنا : بيحصل !
الفيروس : أنا كمان جاي أضرب الفراخ والاقتصاد المصري .. هياها يعني !!
إحنا : دانت فيروس مثقف قوي .. طيب بلاش كلام في السياسة عشان الناس ماتزهقش ..
الفيروس: زى ما تحب ..
إحنا : انت ازاي دخلت الأراضي المصرية ؟
الفيروس : بلاش كلام في النقطة دي لو سمحت .. أنا متسلل صحيح بس مش عايز مشاكل مع الداخلية الله يخليك ..
إحنا : يعني دخلت ازاي ؟
الفيروس: دخلت مع بطة مهاجرة وصلتني في طريقها .. أوتو ستوب يعني !
إحنا : وناوي تعمل ايه في مصر ؟
الفيروس : أبدا .. أنا باتكاثر على البط والوز والفراخ والطيور الظريفة دي.وبصراحه انا ارتحت عندكو في مصر لأني وجدت البيئه مناسبه جدا جدا ناس بلدياتي وعدم اهتمام بالنظافة والفراخ والبط والوز موجودة في كل مكان بدون أي ظوابط فشفتها فرصه عشان أكون سلاله كثيرة وأبناء وأحفاد في كل مكان
وشكرا على كرمكم يا مصريين.
إحنا : طيب مش ناوي تنتقل للبني ادمين ؟
الفيروس : لا طبعا ..
إحنا : ليه ؟
الفيروس: شوف يا بيه .. إحنا الفيروسات غاويين أذية صحيح , لكن مابنحبش نقطّع على بعض .. كلام في سرك كده .. أنا جربت أدخل جسم مواطن مصري .. لقيت لما دخلت لقيت زملاء كتير قوي .. (التهاب كبدي وبائي) على (بلهارسيا) على (التهاب سحائي) على (سرطان) على (سالمونيللا) .. لقيت خلق كتير قوي يا بيه .. لقوني داخل عليهم قاموا وقفوا .. وخدوني على جنب .. ورنوني حتة علقة مكن ,خلتني أزرقّ .. !! شايف البشلة اللي في وشي دي ؟؟ إهي دي ضربة مطوة من الأخ (فشل كلوي) !
إحنا : وبعدين ؟؟
الفيروس : أبدا .. بعد ما خدت العلقة التمام, قعدنا قعدة عرب .. واتكلمنا كلام فيروسات من الآخر واتفقنا على المفيد ..
إحنا : اتفقتوا على ايه بالضبط ؟
الفيروس: اتفقنا على إن انا مش من هنا ومش ابن بلد فلازم ألتزم بالأصول .. وما قطّعش على الميكروبات المصرية الصميمة .. اتفقنا على قاعدة ( صباح الخير يا جاري ,انت في حالك وانا في حالي!) يعني بلاش تقطيع على بعض وخليني في الفراخ والعصافير وما أهوبش ناحية منطقة الميكروبات التانية .. أصلها أرزاق يا بيه وغلط ناخد رزق بعض عدم المؤاخذة .. وده اللي أعلنا عنه في المؤتمر الصحفي بعد المباحثات اللي اجريناها مع بعض في أحد مقالب الزبالة ..
إحنا : تشرفنا بلقاءك يا سيد h5
إحنا :طيب فين محطتك القادمة وفين مخطط تسافر بعد كده .
الفيروس . بصراحة انا مانيش شاايف سبب للسفر دلوقتي عشان انتو المصريين بصراحة ناس كرما خالص والبيئة زى ما قلت لك مناسبه عندكو ورايح أوزع أولادي في كل المحافظات المصرية وفي كل حته وباين علينا حنستقر هنا لفترة طويلة ولو زهقنا ما عندناش مشكله في السفر عشان انتو المصريين بتسافروا للشغل في كل الدول . فممكن ندخل للبني آدميين منكو ولو عجبنا الحال فيكوا اعدنا ولو ما عجبناش نسافر معاكو للبلاد التي رايحين ليها وننتشر فيها
ليست هناك تعليقات:
إرسال تعليق